काठमाडौं : राष्ट्रिय सभाको चालु अधिवेशन अन्त्य गरिएको छ। राष्ट्रपति रामचन्द्र पौडेलले प्रधानमन्त्रीको सिफारिसमा आज राति १२ बजेदेखि अधिवेशन अन्त्य गरेका हुन् ।
संसद् सचिवालयका प्रवक्ता एकराम गिरीले अधिवेशन अन्त्यको सूचना राष्ट्रपति कार्यालयबाट प्राप्त भएको जानकारी दिए । यसअघि प्रधानमन्त्री सुशीला कार्कीको सिफारिसमा राष्ट्रपति पौडेलले प्रतिनिधिसभा विघटन गरिसकेका छन् । प्रतिनिधिसभा विघटनसँगै आगामी फागुन २१ गते मध्यावधि निर्वाचन मिति तोकिएको छ।
निर्वाचन आयोगले यसै मितिलाई लक्ष्य गरी प्रारम्भिक तयारी सुरु गरिसकेको छ। आयोगले आगामी कात्तिक १७ गतेका लागि तोकिएको रुपन्देही क्षेत्र नम्बर ३ को उपनिर्वाचन रद्द गर्दै सम्पूर्ण ध्यान अब मध्यावधि निर्वाचनमा केन्द्रित गरेको छ।
निर्वाचन आयोगका प्रवक्ता नारायणप्रसाद भट्टराईले निर्वाचन घोषणापछि आयोगले सरकारसँग औपचारिक परामर्श, व्यवस्थापकीय तयारी तथा योजना तर्जुमा सुरु गरिसकेको जानकारी दिए ।
यता, नवनियुक्त अर्थमन्त्री रामेश्वर खनालले निर्वाचनका लागि आवश्यक पर्ने बजेट व्यवस्था मिलाउने गरी बजेट परिमार्जन गर्ने घोषणा गरेका छन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |