काठमाडौ : नेतृत्व हस्तान्तरण र संगठन पुनर्गठनको बहस चुलिँदै गर्दा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले मौजुदा केन्द्रीय समिति भंग गरी विशेष महाधिवेशनमार्फत नयाँ नेतृत्व चयन गर्ने प्रस्ताव अघि सारेका छन्।
पार्टी केन्द्रीय कार्यालय, पेरिसडाँडामा बसेको पदाधिकारी बैठकमा प्रचण्डले मंसिरभित्रै विशेष महाधिवेशन सम्पन्न गरी नेतृत्व परिवर्तनको प्रक्रिया अघि बढाउने योजना प्रस्तुत गरेका हुन्। बैठकमा उनले हालको केन्द्रीय समितिलाई विघटन गरी महाधिवेशन आयोजक समिति बनाउने प्रस्ताव राखेका थिए।
उपमहासचिव जनार्दन शर्मालगायत नेताहरूले पछिल्ला केही महिनादेखि नेतृत्व हस्तान्तरणको आवश्यकता औंल्याउँदै आएका थिए। यस्तै दबाबका बीच प्रचण्डले पार्टीभित्र पुरानै ‘क्रमभंगको निरन्तरता’को रणनीति अपनाउँदै समिति भंग गर्ने प्रस्ताव ल्याएका हुन्।
‘पार्टीको नयाँ संरचना निर्माण र मार्गदर्शनको सवालमा विशेष महाधिवेशन अपरिहार्य छ,’ बैठकमा प्रचण्डले भनेको स्रोतले जनायो, ‘त्यसैले हामीले यो बाटो रोजेका हौं।’
प्रचण्डको प्रस्तावमाथि पदाधिकारीबीच गम्भीर छलफल भइरहेको छ भने केही नेताले आकस्मिक महाधिवेशनको आवश्यकता र समयबारे प्रश्न उठाएका छन्। पार्टीको केन्द्रीय समिति बैठक चाँडै बस्ने तयारी भइरहेको छ, जहाँ उक्त प्रस्तावलाई आधिकारिक रूपमा टेबुल गरिने बताइएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |