काठमाडौँ : संविधान संशोधनलाई संस्थागत बहसमा लैजान प्रमुख दलहरू सक्रिय भएका छन् । सरकारले असीम शाहको संयोजकत्वमा संविधान संशोधन बहस कार्यदल गठन गरेपछि प्रमुख प्रतिपक्षी दल नेकपा एमालेले पनि पार्टीभित्र छुट्टै कार्यदल बनाउने भएको छ ।
एमाले अध्यक्ष केपी शर्मा ओलीले गत जेठ ४ गते बसेको सचिवालय बैठकमा उपाध्यक्ष विष्णु पौडेलको संयोजकत्वमा सात सदस्यीय कार्यदल गठन गर्ने प्रस्ताव पेस गरेका हुन्। कार्यदलमा जुलीकुमारी महतो, अग्निप्रसाद खरेल, महेश बर्तौला, कृष्णभक्त पोखरेल, टिकाराम भट्टराई र पासाङ शेर्पा सदस्य रहने प्रस्ताव गरिएको छ।
ओलीको प्रस्तावमाथि शुक्रबार बस्ने सचिवालय बैठकमा छलफल गरी निर्णय गर्ने तयारी एमालेको छ। पार्टीभित्र संविधान संशोधनका विषय, एजेन्डा र राजनीतिक सहमतिबारे अध्ययन तथा सुझाव दिन कार्यदल गठन गर्न लागिएको नेताहरूले बताएका छन्।
यसअघि सरकारले संविधान संशोधनसम्बन्धी बहस र सुझाव संकलनका लागि असीम शाहको संयोजकत्वमा कार्यदल गठन गरिसकेको छ। प्रमुख राजनीतिक दलहरूले संविधान संशोधनलाई आगामी राजनीतिक बहसको केन्द्रमा लैजान थालेसँगै यससम्बन्धी गतिविधि तीव्र बनेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |