पूर्वजहरूको बलिदानीले बनेको नेपाल ‘निर्वाहमुखी’ हैसियतमा खुम्चियो : मोक्तान

काठमाडौँ :  राजनीतिक विश्लेषक बुद्धछिरिङ मोक्तानले नेपाल राज्य र यहाँको राजनीतिक नेतृत्व दीर्घकालीन योजनाविना परनिर्भरतामा चलेको आरोप लगाएका छन्। राजधानीमा आयोजित एक कार्यक्रममा बोल्दै उनले पूर्वजहरूको सङ्घर्ष र बलिदानबाट जोगिएको देश अहिले एउटा सबल ‘स्टेट’ का रूपमा उभिन नसकी ‘जिरो’ अवस्थामा पुगेको टिप्पणी गरे।

मोक्तानले नेपाली समाज ऐतिहासिक रूपमा आफैँलाई चाहिने वस्तु उत्पादन गरेर निर्वाहमुखी प्रणालीमा बाँचेको स्मरण गरे। तर, देश साझा राष्ट्र-राज्य बनिसक्दा पनि शासकीय संरचना पुरानै सोचभन्दा माथि उठ्न नसकेको उनको भनाइ थियो। ‘जसरी नागरिकले योजनाविना दैनिक जीवन धान्छ, त्यसै गरी नेपाल राज्य पनि थोरै रेमिट्यान्स र वैदेशिक सहायताका भरमा जेनतेन चलिरहेको छ’,-उनले भने।

राज्य सञ्चालनको परिपाटीप्रति तिखो व्यङ्ग्य गर्दै उनले कर्मचारी र मन्त्रीहरू उपभोक्तावादी महत्त्वाकाङ्क्षा पुरा गर्न भ्रष्टाचार र घुसखोरीमा लिप्त भएको आरोप लगाए। देशमा ठुला विपत्ति आउँदा विदेशीले पाल र नुन बाँडिदिने आशमा बस्ने अवस्था आएको भन्दै उनले प्रधानमन्त्रीको भूमिका मागेर ल्याउने र खाने यजमानी गर्ने जस्तो मात्रै भएको टिप्पणी गरे।

राज्यको आफ्नै सामर्थ्य र बडी पोलिटिकु बलियो हुनुपर्नेमा जोड दिँदै उनले सङ्कटका बेला नेपाल राज्यको वास्तविक हैसियत उदाङ्गो हुने गरेको बताए। कुनै पनि ठुलो सङ्कट आउँदा राज्यको उपस्थिति शून्य देखिने भन्दै उनले अब सक्षम राज्य निर्माणमा लाग्नुपर्ने चेतावनी दिए।