काठमाडौँ : सर्वोच्च अदालतले नेपाली कांग्रेसका सांसद अभिषेकप्रताप शाहलाई तत्काल पक्राउ नगर्न अन्तरिम आदेश दिएको छ। न्यायाधीश अव्दुल अजीज मुसलमानको एकल इजलासले शाहविरुद्ध जारी पक्राउ पुर्जी यथास्थितिमा राख्न आदेश दिएको हो।
कृष्णनगर उद्योग वाणिज्य संघका अध्यक्ष सीताराम शर्मामाथि कुटपिट गरेको आरोपमा कपिलवस्तु जिल्ला अदालतले सांसद शाहलाई पक्राउ गर्न प्रहरीलाई अनुमति दिएको थियो। उक्त आदेशविरुद्ध सर्वोच्च पुगेका शाहको निवेदनमा प्रारम्भिक सुनुवाइ गर्दै अदालतले तत्काल पक्राउ नगर्न अन्तरिम आदेश जारी गरेको हो।
यस प्रकरणमा सांसद शाहसँगै कृष्णनगर नगरपालिकाका मेयर रजतप्रताप शाहविरुद्ध पनि ज्यानसम्बन्धी कसुरमा पक्राउ पुर्जी जारी भएको छ। घटनासँग सम्बन्धित सीताराम शर्माविरुद्ध भने आपराधिक उपद्रवसम्बन्धी मुद्दामा पक्राउ पुर्जी जारी भएको प्रहरीले जनाएको छ। अब यस मुद्दामा दुवै पक्षको कानुनी बहसपछि सर्वोच्च अदालतले अन्तिम निर्णय गर्नेछ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |