काठमाडौँ : गृहमन्त्री सुधन गुरुङ र हिन्दू सम्राट सेना नेपालबीच भएको वार्तापछि आन्दोलन स्थगित गर्ने तथा माग कार्यान्वयनका लागि आवश्यक प्रक्रिया अघि बढाउने समझदारी भएको छ। जनकपुरधामस्थित एक होटलमा करिब डेढ घण्टा चलेको वार्तामा सरकारी टोली र सेनाका प्रतिनिधिबीच विभिन्न विषयमा सहमति जुटेको हो।
हिन्दू सम्राट सेना नेपालले यसअघि पेश गरेको १३ बुँदे मागमा थप ६ बुँदा समेट्दै १९ बुँदे प्रस्ताव सरकारलाई बुझाएको छ। सेनाका उपाध्यक्ष कृष्ण सनातनीका अनुसार सरकारले मागलाई सकारात्मक रूपमा ग्रहण गर्दै कार्यान्वयनका लागि उपयुक्त समयमा समिति गठन गर्ने प्रतिबद्धता जनाएको छ।
समझदारीअनुसार आन्दोलनका क्रममा पक्राउ परेका सबैलाई रिहा गर्ने, उनीहरूमाथि मुद्दा नचलाउने तथा गोली चलाउने सुरक्षाकर्मीको निष्पक्ष छानबिन गरी दोषी ठहरिए कानुनबमोजिम कारबाही गर्ने विषयमा पनि सहमति भएको छ।
सरकारी पक्षबाट माग सम्बोधन हुने आश्वासन पाएपछि हिन्दू सम्राट सेनाले जारी सबै आन्दोलन र विरोधका कार्यक्रम फिर्ता लिएको जनाएको छ। गृहमन्त्री गुरुङले सरकारले यसअघि प्राप्त १३ बुँदे र आइतबार बुझाइएको थप ६ बुँदे मागपत्र औपचारिक रूपमा ग्रहण गरेको बताएका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |