काठमाडौँ : कर्णाली प्रदेश सरकारले रसुवाको भोटेकोशी तटीय क्षेत्रमा आएको बाढीबाट प्रभावितका लागि २ करोड रुपैयाँ आर्थिक सहयोग उपलब्ध गराउने निर्णय गरेको छ। मन्त्रिपरिषद्को आज बिहान बसेको बैठकले बाढीप्रभावितको उद्धार, राहत, पुनर्स्थापना र पुननिर्माणका लागि प्रधानमन्त्री दैवी प्रकोप उद्धार कोषमा उक्त रकम जम्मा गर्ने निर्णय गरेको हो।
बाढीका कारण रसुवा क्षेत्रमा ठूलो जनधनको क्षति भएपछि कर्णाली सरकारले ऐक्यबद्धता जनाउँदै उद्धार कोषमार्फत सो सहयोग हस्तान्तरण गर्न लागेको हो।
यसैगरी, मन्त्रिपरिषद् बैठकले सामाजिक विकास मन्त्रालयद्वारा तयार पारिएको दीर्घकालीन ‘शिक्षा क्षेत्र योजना २०८३–२०९२’ स्वीकृत गरेको छ। आगामी १० वर्षभित्र कर्णालीको समग्र शैक्षिक क्षेत्रको सुधार, पूर्वाधार विकास र गुणस्तर अभिवृद्धि गर्ने लक्ष्यसहित यो १० वर्षे रणनीति पारित गरिएको प्रदेश सरकारले जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |