काठमाडौँ : नेपालमा हालै आएको विनाशकारी बाढीबाट प्रभावित समुदायको उद्धार तथा राहतका लागि काठमाडौँमा आयोजित एक विशेष सांस्कृतिक कार्यक्रमबाट संकलित रकमको केही हिस्सा सहयोग गरिने भएको छ।
नेपाल र रूसबीच कूटनीतिक सम्बन्ध स्थापना भएको ७० वर्ष पूरा भएको अवसरमा सुशीला आर्ट्स एकेडेमी र रसियन हाउसको संयुक्त आयोजनामा सानेपास्थित डि.ए.भी. अडिटोरियममा आयोजित रियल रिदम एन्ड सोल्स २०२६ समारोहमा उक्त परोपकारी घोषणा गरिएको हो। कला र कूटनीतिसँगै सामाजिक उत्तरदायित्वलाई जोड्दै आयोजकले कार्यक्रमको आम्दानी बाढीपीडितको पुनरुत्थानमा खर्चिने जनाएका छन्।
समारोहमा मस्कोको प्रसिद्ध बोल्शोई थिएटरकी विश्वविख्यात ब्याले कलाकार एकातेरिना चेर्निच र नेपाली नृत्य टोलीले संयुक्त रूपमा बेजोड प्रस्तुति दिएका थिए। कार्यक्रममा ‘स्वान लेक’ र ‘द डाइङ स्वान’ जस्ता शास्त्रीय रुसी ब्यालेका अंशका साथै नेपाली र भारतीय शास्त्रीय नृत्य, एरियल एक्रोब्याटिक्स, हिपहप तथा लाइभ भायोलिनको उत्कृष्ट संयोजन देखाइएको थियो। यसअघि भदौ १३ (अगस्ट २९) मा रसियन हाउसमा कलाकार चेर्निचले नेपाली नृत्य निर्देशक तथा विद्यार्थीहरूका लागि ब्यालेको विशेष मास्टर क्लाससमेत सञ्चालन गरेकी थिइन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |