कांग्रेस रूपान्तरणको खाका : मधु आचार्यको १० बुँदे रोडम्याप

काठमाडौं : नेपाली कांग्रेसका केन्द्रीय सदस्य मधु आचार्यले पार्टी संगठन सुदृढीकरणदेखि सत्तारूढ गठबन्धनको कार्यसम्पादन समीक्षा र संविधान संशोधनसम्मका विषय समेटिएको १० बुँदे कार्यसूची पेश गरेका छन्।

आइतबार पार्टीको केन्द्रीय कार्यसमिति बैठकमा उनले १५औं महाधिवेशन यही वर्षको चैत्र मसान्तसम्म गर्न सकिने धारणा राखेका हुन् । उनले भने, ‘कार्तिक मसान्तसम्म क्रियाशील सदस्यता नवीकरण, मंसीरभित्र वडा र पालिका अधिवेशन, पुष, माघ, फागुनमा अन्य तहको अधिवेशन गरी चैत्रमा भव्य महाधिवेशन गरौं।’ उनले विधान परिमार्जनका लागि तत्काल ‘विधान संशोधन सुझाव मस्यौदा समिति’ गठन गर्न पनि माग गरेका छन्।

सत्ता गठबन्धनको कार्यप्रदर्शनप्रति असन्तुष्टि व्यक्त गर्दै उनले सरकारलाई थप प्रभावकारी बनाउन एजेण्डा र रणनीतिमा पुनरावलोकन गर्नुपर्ने बताए। ‘शिक्षक, किसान, विद्यार्थी, मिटरब्याजी पीडित, भूमिहीन र बाढी पहिरो पीडितसँग भएका सहमति र प्रतिवद्धता कार्यान्वयन गरौं,’ उनले भने।

संविधान संशोधनबारे पार्टीभित्र आन्तरिक बहस थाल्नुपर्ने र त्यसका लागि ‘संविधान संशोधन सुझाव समिति’ गठन गर्नुपर्ने उनले औंल्याए। सर्वोच्च अदालतबाट हालै आएको फैसलाले संविधानको मर्ममाथि प्रहार गरेको भन्दै आचार्यले शक्ति सन्तुलन बिग्रिएको जिकिर गरे।

भातृ संस्थाको दुई वर्षे अधिवेशन चक्र कायम गर्दै सफ्टवेयर प्रणालीमार्फत प्रत्यक्ष निर्वाचन गर्नुपर्ने प्रस्ताव उनले राखेका छन्। साथै, पार्टीको कार्यकाल चार वर्षबाट घटाएर तीन वर्ष कायम गर्नुपर्ने सुझाव पनि दिएका छन्।

सुशासन प्रवर्द्धनका लागि उनले ‘नेपाली कांग्रेस सुशासन र सुसंस्कार निर्देशिका’ जारी गर्नुपर्ने धारणा राखे। बाँकी विभागहरू गठन गरी त्यसमा युवाको उल्लेखनीय सहभागिता सुनिश्चित गर्नुपर्ने उनले बताए।

भ्रष्टाचारविरुद्ध कडा लाइन लिनुपर्ने उल्लेख गर्दै उनले भने, ‘कोही अपराधी उम्किन नपाओस्, निर्दोष नफसुन भन्ने हाम्रो दृष्टिकोण अझ प्रखर बनाऔं।’

चितवनमा गरिएको सय दिने विशेष अभियानको अनुभव सुनाउँदै उनले दुई अभियान सञ्चालनको प्रस्ताव पनि बैठकमा राखे – “आन्तरिक मेलमिलाप तथा एकता अभियान” र “जनताको सरोकार, जनतासँग एकाकार अभियान।”
पार्टी रूपान्तरणका लागि नेतृत्वले बहस र सुझावलाई गम्भीरतापूर्वक लिनुपर्ने आचार्यको आग्रह छ।