काठमाडौं : उखु किसान र सरकारबीच भएको वार्ता बिना कुनै सहमति टुंगिएको छ । शुक्रबार सिंहदरबारमा भएको छलफलमा कृषिमन्त्री रामनाथ अधिकारीले आन्दोलन रोक्न आग्रह गरे पनि किसानहरूले अस्वीकार गरेका हुन् ।
उखु किसान संघर्ष समितिका प्रवक्ता उमेशचन्द्र यादवका अनुसार, सरकारले केही दिनका लागि आन्दोलन स्थगित गर्न आग्रह गरे पनि समितिले भने आन्दोलन नरोकिने तर त्यसको स्वरूप परिवर्तन गर्न सकिने जवाफ दिएको छ । किसानहरूले प्रतिक्विन्टल ७० रुपैयाँ अनुदान पाउनुपर्ने मुख्य माग राखेका छन् ।
प्रवक्ता यादवले कृषि मन्त्रालयले वार्षिक बजेटमा उखु किसानका लागि २ अर्ब रुपैयाँ अनुदान छुट्याए पनि अर्थ मन्त्रालयले बजेट रोकेर असहयोग गरेको आरोप लगाए । उनले दशैँअघि नै ७५ करोड रुपैयाँ निकासा गर्नुपर्ने आफ्नो ‘बटमलाइन’ रहेको बताए । यसअघि नै ७५ करोड रुपैयाँ निकासा भइसकेको यादवले जानकारी दिए ।
आफ्नो आन्दोलनको आगामी कार्यक्रमबारे जानकारी दिन शनिबार बिहान ११ बजे माइतीघरमा पत्रकार सम्मेलन गरिने संघर्ष समितिले जनाएको छ ।
