काठमाडौं : प्रमुख प्रतिपक्षी दल नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ सोमबार प्रतिनिधिसभामा समसामयिक विषयमा धारणा राख्ने भएका छन्।
प्रमुख प्रतिपक्षी दलको नेताको हैसियतमा उनले विशेष समय लिएर बोल्ने तयारी गरेका हुन्। प्रचण्डले हालै रसुवामा आएको बाढी–पहिरोको अवस्था, उद्धार र राहतमा देखिएको सुस्तता, सरकारको तयारी र संकट व्यवस्थापन क्षमतामाथि प्रश्न उठाउने छन्। साथै, उनले भिजिट भिसा प्रकरणमार्फत बढ्दो मानव तस्करी, विदेशी भूमिमा नेपाली श्रमिकमाथिको शोषण र राज्य संयन्त्रको लाचारपनसमेत संसदमा उठाउने तयारी गरेका छन्। संसदमा उठ्ने अर्को महत्वपूर्ण विषय स्पेन भिजिट भिसा काण्डसम्बन्धी रहन सक्नेछ। प्रधानमन्त्री केपी शर्मा ओलीको नेतृत्वमा गएको टोलीका केही सदस्यहरू युरोपमै बेपत्ता रहेको भन्दै त्यसबारे स्पष्ट पार्न सरकारमाथि विपक्षीले दबाब दिँदै आएका छन्।
सरकारका प्रवक्तादेखि गृहमन्त्रीसम्मले यसबारे जवाफ दिनुपर्ने माग उठिरहेका बेला प्रचण्डले प्रधानमन्त्री स्वयंको भूमिकामाथि प्रश्न उठाउने संकेत दिएका छन्। भिजिट भिसाको नाममा भइरहेको मानव तस्करी, ट्राभल तथा म्यानपावर कम्पनीको मिलोमतो, सरकारी संयन्त्रको प्रत्यक्ष वा परोक्ष संलग्नता र यसमाथि सरकारको सुस्त व्यवहारबारे प्रचण्डले आलोचनात्मक टिप्पणी गर्ने तयारी गरेका छन्। गत सातादेखि संसदमा रास्वपाका सांसदहरूले पनि सोही विषयमा कडा प्रश्न उठाइरहेका छन्।
प्रचण्डको सम्बोधनले ती विषयलाई थप संस्थागत ढंगमा प्रस्तुत गर्ने अपेक्षा गरिएको छ । अध्यक्ष प्रचण्डले सम्बोधन गर्ने भएपछि माओवादी केन्द्रले आफ्ना सबै सांसदलाई अनिवार्य उपस्थित हुन निर्देशन दिएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |