काठमाडौँ : माधवकुमार नेपाल नेतृत्वको नेकपा (एकीकृत समाजवादी) र वामदेव गौतम नेतृत्वको नेकपा एकता राष्ट्रिय अभियान एकताबद्ध हुने भएका छन्।
दुवै पक्षबीच शुक्रबार भएको सहमतिपछि आगामी साउन २ गते काठमाडौँको राष्ट्रिय सभा गृहमा पार्टी एकता घोषणा गर्ने कार्यक्रम तय गरिएको छ।
शुक्रबार जारी सहमतिपत्रमा राजनीतिक दर्शन, सिद्धान्त, कार्यक्रम, रणनीति र कार्यदिशामा एकरूपता रहेको उल्लेख गर्दै ‘नेपालको कम्युनिस्ट आन्दोलनलाई एकताबद्ध गर्नु पर्ने ऐतिहासिक आवश्यकता’लाई ध्यानमा राख्दै पार्टी एकता गर्ने उल्लेख गरिएको छ।
एमाले विभाजनपछि नेपालले एकीकृत समाजवादी गठन गरेका थिए भने गौतम एमाले उपाध्यक्षबाट राजीनामा दिएर छुट्टै अभियानमा लागेका थिए। केही समय एमालेमै फर्किने सम्भावनामा रहेका गौतम अन्ततः समाजवादीसँग एकता गर्न राजी भएका हुन्।
गौतम यसअघि पनि समाजवादीसँग एकता गर्न इच्छुक थिए। तर एमाले अध्यक्ष केपी ओलीले पार्टीमा फर्किने आश्वासन दिएपछि उनी पछि हटेका थिए। पछिल्लोपटक भने उनीहरूबीच लिखित सहमति भएको हो।
दुवै नेताले एमाले निर्माणमा सक्रिय भूमिका खेलेका थिए। पार्टी एकतापछि समाजवादी नेतृत्वको पक्षमा रहने सहमतिसमेत भएको बताइएको छ।
