काठमाडौं : नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले वर्तमान राजनीतिक परिस्थितिमा देशलाई निकास दिने एकमात्र उपाय निर्वाचन भएको बताएका छन्। बानेश्वर क्याम्पसमा स्ववियुले आयोजना गरेको कार्यक्रममा बोल्दै उनले निर्वाचनको विकल्प खोज्ने प्रयासले देशलाई दुर्घटनातर्फ धकेल्न सक्ने चेतावनी दिए।
उनका अनुसार विभिन्न राजनीतिक उतारचढावपछि अब निर्वाचनमार्फत देशलाई स्थायित्वतर्फ लैजाने वातावरण बनेको छ। प्रचण्डले नेपाली जनताको एकता, राजनीतिक दलहरू तथा सबै सरोकारवालाको सामूहिक प्रयासबाट मात्रै राष्ट्रलाई निकास दिन सकिने बताए। अराजकताबाट मुलुकलाई जोगाउन समयमै निर्वाचन गरिनु अपरिहार्य रहेको उनको भनाइ थियो।
निर्वाचनको तयारीका सन्दर्भमा आवश्यक कामहरू अघि बढिरहेको र सबै राजनीतिक दलहरू सक्रिय रहेको उनले जानकारी दिए। उनले जेन्जी आन्दोलनले युवापुस्तामा राजनीति र सुशासनप्रति सचेतना बढाएको सन्देश गएको उल्लेख गरे।
कार्यक्रममा उनले सामुदायिक क्याम्पसहरूको स्तरवृद्धि चुनौतीपूर्ण रहे पनि बानेश्वर क्याम्पसले गरिरहेको प्रयासको प्रशंसा गरे।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |