रास्वपा सचिवालय बैठक आज बस्दै

काठमाडौँ : राष्ट्रिय स्वतन्त्र पार्टीले प्रतिनिधिसभा सदस्य निर्वाचनअन्तर्गत समानुपातिकतर्फका उम्मेदवार सिफारिसबारे निर्णय गर्न सचिवालय बैठक बोलाएको छ। पार्टी सभापति रवि लामिछानेको निर्देशनमा बस्ने उक्त बैठकले समानुपातिक उम्मेदवार चयनका साथै पार्टीको आगामी राजनीतिक रणनीतिबारे पनि छलफल गर्ने तयारी गरिएको छ।

पार्टी प्रवक्ता मनिष झाले शनिबार बस्ने सचिवालय बैठकको समय र स्थान भने अझै तय नभएको जानकारी दिए। उनका अनुसार बैठकमा समानुपातिकतर्फका उम्मेदवार सिफारिससम्बन्धी मापदण्ड, सम्भावित नाम र प्रक्रिया तय गर्ने विषय मुख्य एजेन्डाका रूपमा रहनेछ।

बैठकमा पार्टीको विधान संशोधनसम्बन्धी प्रस्तावमाथि समेत छलफल हुने बताइएको छ। वरिष्ठ नेता बालेन्द्र शाहलाई प्रधानमन्त्री बनाउने सम्भावना खुलाउने गरी विधान संशोधन गर्ने विषयमा पनि केन्द्रीय तहमा बहस हुने बताइएको छ ।

रास्वपाले समानुपातिकतर्फको उम्मेदवार सिफारिस प्रक्रिया टुंग्याउँदै आगामी राजनीतिक रणनीति स्पष्ट गर्ने तयारी गरेको बताइएको छ।