काठमाडौं : विश्व प्रेस स्वतन्त्रता दिवसका अवसरमा राष्ट्रपति रामचन्द्र पौडेलले पत्रकारितालाई सत्य र तथ्यमा आधारित बनाई समाजप्रति अझ जिम्मेवार बन्न आग्रह गरेका छन्। उनले नेपाली सञ्चार क्षेत्रलाई संविधानप्रदत्त अधिकारको निर्भय प्रयोग गर्दै आमनागरिकसम्म सत्य सूचना पुर्याउन सफलताको शुभकामना दिएका हुन्।
मे ३, २०२६ को सन्दर्भमा स्वदेश तथा विदेशमा रहेका सम्पूर्ण पत्रकार तथा नेपालीहरूलाई सन्देश दिँदै उनले स्वतन्त्र पत्रकारिताले समाजमा सत्य स्थापित गर्न महत्वपूर्ण भूमिका खेल्ने बताए। लोकतन्त्रको आधारस्तम्भका रूपमा रहेको प्रेसले विभिन्न आन्दोलनहरूमा खेलेको भूमिकालाई उनले स्मरण गरे।
राष्ट्रपति पौडेलले प्रेस स्वतन्त्रता नागरिकको सुसूचित हुने अधिकारसँग प्रत्यक्ष जोडिएको उल्लेख गर्दै निष्पक्ष र सबल पत्रकारिताले लोकतन्त्रलाई थप सुदृढ बनाउने धारणा राखे। साथै, पत्रकारहरूलाई सुरक्षित वातावरण आवश्यक रहेको र संविधानले पूर्ण अभिव्यक्ति स्वतन्त्रताको प्रत्याभूति गरेको उनले बताए।
सामाजिक सञ्जालमार्फत फैलिने भ्रामक सूचनाले चुनौती सिर्जना गरिरहेको उल्लेख गर्दै उनले सत्य, तथ्य र विश्वसनीय सूचना प्रवाह गर्न सञ्चार क्षेत्रलाई आह्वान गरेका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |