काठमाडौँ : आगामी स्थानीय तह निर्वाचन र संगठन सुदृढीकरणको तयारी तीव्र बनाउँदै राष्ट्रिय स्वतन्त्र पार्टीले आज सचिवालय बैठक बोलाएको छ। पार्टी सभापतिको निर्देशनमा काठमाडौँको वनस्थलीस्थित केन्द्रीय कार्यालय ‘घन्टीघर’मा बस्ने बैठकमा महत्वपूर्ण नीतिगत विषयहरूमा छलफल हुने भएको हो ।
प्रवक्ता मनिष झाले बैठकमा चार प्रमुख एजेण्डा तय गरिएको जानकारी दिएका छन्। तीमध्ये ‘स्थानीय तह उम्मेदवार छनोट रूपरेखा २०८३’ मुख्य प्राथमिकतामा रहेको छ, जसले आगामी निर्वाचनका लागि उम्मेदवार छनोटको मापदण्ड तय गर्नेछ।
यस्तै, संगठन विस्तारका लागि ‘महाधिवेशन कार्यविधि २०८३’ माथि विस्तृत छलफल हुने जनाइएको छ। साथै, संसदीय दलको विधान संशोधनसम्बन्धी विषय पनि बैठकको अर्को महत्वपूर्ण एजेण्डा रहेको छ।
यसका अतिरिक्त ‘विविध’ शीर्षकअन्तर्गत समसामयिक राजनीति, पार्टी रणनीति र आन्तरिक विषयहरूमा समेत छलफल हुने रास्वपाले जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |