लिपुलेकको रूटबाट खोलिएको मानसरोवर यात्रामा भारत र चीनलाई सरकारको पत्र

काठमाडौँ : लिपुलेक हुँदै कैलाश मानसरोवर यात्रा सञ्चालन गर्ने भारतको तयारीप्रति नेपालले औपचारिक असहमति जनाउँदै भारत र चीन दुवैलाई कूटनीतिक नोट पठाएको छ। आइतबार परराष्ट्र मन्त्रालयले पहिलोपटक सार्वजनिक धारणा व्यक्त गर्दै उक्त विषयमा आफ्नो स्पष्ट अडान पुनः अवगत गराएको जनाएको हो।

परराष्ट्र प्रवक्ता लोकबहादुर पौडेल क्षेत्रीका अनुसार नेपालले लिपुलेक क्षेत्र आफ्नो अभिन्न भूभाग भएको विषयमा दुवै देशलाई जानकारी गराइसकेको छ। भारतले कोभिडपछि बन्द रहेको नाका पुनः सञ्चालन गर्ने तयारीसँगै तीर्थयात्रा खुलाउने संकेत गरेपछि नेपालले आपत्ति जनाएको हो।

मन्त्रालयले १८१६ को सुगौली सन्धिअनुसार महाकाली नदीपूर्वका लिम्पियाधुरा, लिपुलेक र कालापानी नेपालकै भूभाग भएको दोहोर्‍याएको छ। यसअघि पनि सो क्षेत्रमा सडक निर्माण, व्यापार र तीर्थाटनजस्ता गतिविधि नगर्न भारतलाई आग्रह गरिँदै आएको उल्लेख गरिएको छ। चीनलाई समेत उक्त क्षेत्रको अवस्थाबारे आधिकारिक जानकारी दिइएको मन्त्रालयले जनाएको छ।