सरकारलाई रास्वपा सांसद अमेरशले गराए ध्यानाकर्षण

काठमाडौँ : सत्तारुढ रास्वपा सांसद अमरेशकुमार सिंहले प्रतिनिधिसभामा उखु किसानले समयमै भुक्तानी नपाएको विषय उठाउँदै सरकारको ध्यानाकर्षण गराएका छन्। उनले चिनी उद्योगहरूले किसानको बाँकी रकम अझै नदिएको भन्दै तत्काल भुक्तानी सुनिश्चित गर्न माग गरे। साथै सरकारले उपलब्ध गराउने अनुदानसमेत किसानसम्म पुग्न नसकेको उल्लेख गर्दै प्रक्रिया छिटो बनाउन आग्रह गरे।

सांसद सिंहले रोपाइँको समय नजिकिँदै गर्दा रासायनिक मलको अभाव गम्भीर बन्दै गएको बताए। आगामी १०–१५ दिनभित्र रोपाइँ सुरु हुने भएकाले किसानलाई सहज रूपमा मल उपलब्ध गराउन सरकारलाई आग्रह गरे।

त्यसैगरी उनले बागमती नदीको कटानका कारण सर्लाहीको बरहथवा नगरपालिकाका वडा नम्बर १ देखि ४ सम्म उच्च जोखिममा परेको बताए। कटान नियन्त्रणका लागि तत्काल पहल नभए करिब ५० हजारभन्दा बढी स्थानीय विस्थापित हुने अवस्था आउन सक्ने चेतावनी उनले दिएका छन्।