टिकटकर तुल्सा अधिकारीलाई थाइल्याण्डबाट ल्याइयो

काठमाडौं : ठगी तथा सम्पत्ति शुद्धीकरण मुद्दामा फरार रहेकी टिकटकर तुल्सा अधिकारीलाई थाइल्याण्डबाट पक्राउ गरी नेपाल ल्याइएको छ। अन्तर्राष्ट्रिय प्रहरी संगठन (इन्टरपोल) मार्फत जारी रेड नोटिसका आधारमा पक्राउ परेकी अधिकारी हाल ललितपुर प्रहरीको हिरासतमा रहेकी छन्।

ललितपुर प्रहरीका अनुसार अधिकारीविरुद्ध ६ करोड ५२ लाख २९ हजार ७५ रुपैयाँ ठगी तथा सम्पत्ति शुद्धीकरणसम्बन्धी मुद्दा दर्ता भएको थियो। अनुसन्धानका क्रममा उनी विदेश फरार भएको खुलेपछि नेपाल प्रहरीले इन्टरपोलमार्फत रेड नोटिस जारी गरेको थियो।

अधिकारीविरुद्ध गत साउनमा प्रहरी वृत्त सातदोबाटोमा ठगी तथा आपराधिक विश्वासघातको कसुरमा उजुरी परेको थियो। सातदोबाटोस्थित ‘हाम्रो अटोमोबाइल्स’ का सञ्चालक कुमार चिमोरियाले जाहेरी दिएपछि प्रहरीले अनुसन्धान अघि बढाएको थियो।

अनुसन्धानका क्रममा अधिकारीसँग सम्बन्धित बैंक खातामा ठूलो परिमाणमा आर्थिक कारोबार भएको देखिएपछि सम्पत्ति शुद्धीकरणको कोणबाट समेत छानबिन सुरु गरिएको प्रहरीले जनाएको छ। घटनाबारे थप अनुसन्धान भइरहेको प्रहरीको भनाइ छ ।