धनगढी : सुदूरपश्चिम प्रदेशका मुख्यमन्त्री तथा नेपाली कांग्रेस संसदीय दलका नेता कमलबहादुर शाहविरुद्ध दलभित्रै अविश्वासको प्रस्ताव दर्ता भएको छ। कांग्रेसका १८ प्रदेशसभा सदस्य मध्ये ९ जनाले शाहको नेतृत्वप्रति असन्तुष्टि जनाउँदै संसदीय दलमा प्रस्ताव दर्ता गराएका हुन्।
सांसद दिवानसिंह विष्टका अनुसार लामो समयदेखि अमेरिकामा रहेका सांसद प्रकाश देउवा बाहेक नेपालमा रहेका बहुमत सदस्यको समर्थनमा अविश्वास प्रस्ताव दर्ता गरिएको हो। केही समययता कांग्रेसभित्रै मुख्यमन्त्रीको कार्यशैलीलाई लिएर असन्तुष्टि बढ्दै गएको थियो।
मुख्यमन्त्री शाहले आफूलाई बहुमत सांसदको समर्थन नरहे पद छाड्न तयार रहेको बताएका थिए। त्यसपछि असन्तुष्ट पक्षले हस्ताक्षर संकलन अभियान सुरु गरेको थियो। प्रस्ताव दर्तासँगै कांग्रेस संसदीय दलभित्रको विवाद औपचारिक रूपमा सतहमा आएको छ। अब दलको आन्तरिक प्रक्रियामार्फत प्रस्तावमाथि छलफल र निर्णय हुने जनाइएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |