मिडिया ट्रायलप्रति गृहमन्त्री गुरुङको चेतावनी

काठमाडौं :  नवनियुक्त गृहमन्त्री सुधन गुरुङले मिडिया ट्रायलका नाममा कुनै पनि नागरिकको चरित्रहत्या हुने वा आत्महत्या गर्नुपर्ने अवस्था सिर्जना हुन नदिन गृह मन्त्रालय संवेदनशील रहेका बताएका छन् ।

दोस्रो पटक गृहमन्त्रालयको कमाण्ड सम्हाल्ने क्रममा मंगलबार गृह मन्त्रालयमा पदभार ग्रहण गरेपछि सञ्चारकर्मीसँग संक्षिप्त कुरा गर्दै उनले तथ्य र प्रमाणका आधारमा आलोचना स्वीकार्य भए पनि व्यक्तिको मानमर्दन गर्ने, अपमानित गर्ने तथा गलत सूचना फैलाउने प्रवृत्ति सह्य नहुने बताए । आफूविरुद्ध जस्तोसुकै आरोप आए पनि सामना गर्न सक्ने उल्लेख गर्दै गुरुङले सामान्य नागरिकमाथि हुने अन्यायप्रति भने मन्त्रालय गम्भीर रहने बताए।

विशेषगरी महिलामाथि हुने चरित्रहत्याका घटनाप्रति चिन्ता व्यक्त गर्दै उनले यस्ता गतिविधिले व्यक्तिलाई गम्भीर मानसिक दबाबमा पार्न सक्ने बताए। “माथि जे भन्नु छ भन्नुस्, तर तथ्य तोडमोड गरेर कसैलाई अपमानित गर्ने काम हुनु हुँदैन,” उनले भने।

गुरुङले आफू पुनः गृह मन्त्रालयको जिम्मेवारीमा फर्किँदा केही व्यक्ति खुसी र केही असन्तुष्ट हुन सक्ने टिप्पणी पनि गरे।