काठमाडौं : संसद्मा प्रस्तुत आर्थिक विधेयकमा करका दर पटक-पटक हेरफेर गरिएको तथा विधेयकका पाना गायब बनाइएको भन्ने आरोपलाई अर्थमन्त्री डा। स्वर्णिम वाग्लेको सचिवालयले अस्वीकार गरेको छ। सचिवालयले यस्ता समाचारलाई अर्थमन्त्रीको मानमर्दन गर्ने र बजेटका उपलब्धिलाई तोडमोड गरेर प्रस्तुत गर्ने नियोजित दुष्प्रचारको संज्ञा दिएको छ।
अर्थमन्त्रीका स्वकीय उपसचिव तथा सल्लाहकार नवीन ढुंगानाका अनुसार जेठ १५ मा संसद्मा पेस गरिएको आर्थिक विधेयकमा केही भाषिक त्रुटि र अस्पष्टता देखिएपछि जेठ १७ मा संघीय संसद् सचिवालयमा निवेदन दिई सच्याइएको थियो। उनका अनुसार उक्त प्रक्रियामा करका दर वा नीतिगत व्यवस्था परिवर्तन गरिएको होइन।
विधेयकका १६ पाना हराएको भन्ने टिप्पणीबारे पनि सचिवालयले स्पष्टीकरण दिएको छ। टेबल तथा पेज लेआउट मिलाउँदा पृष्ठ संख्या घटेको भए पनि विधेयकको कुनै शब्द, प्रावधान वा आशय परिवर्तन नभएको सचिवालयको दाबी छ। सार्वजनिक भएका समाचारहरूले तथ्यभन्दा भ्रम फैलाउने उद्देश्य बोकेको पनि सचिवालयले जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |