राजदरबार हत्याकाण्डबारे थप छानबिन हुने

काठमाडौं : गृहमन्त्री सुधन गुरुङले दुई दशकअघि भएको राजदरबार हत्याकाण्डबारे थप छानबिन प्रक्रिया अघि बढाउने घोषणा गरेका छन्। पदबहालीलगत्तै सोमबार उनले यसअघिका अनुसन्धान प्रतिवेदनहरूको अध्ययन गरी आवश्यक भए थप अनुसन्धान गरिने बताएका हुन्।

गृह मन्त्रालयमा पदभार ग्रहणपछि सञ्चारकर्मीसँग कुरा गर्दै गुरुङले २०५८ जेठ १९ गते भएको घटनाबारे उठ्दै आएका जिज्ञासा र चासोलाई ध्यानमा राखेर थप अध्ययन तथा छानबिनको निर्णय गरिएको जानकारी दिए। उनका अनुसार हालसम्म तयार भएका प्रतिवेदन, निष्कर्ष र उपलब्ध प्रमाणहरूको पुनरवलोकन गरी आवश्यक प्रक्रिया अघि बढाइनेछ।

नेपालको राजनीतिक इतिहासकै चर्चित र विवादास्पद घटनामध्ये एक मानिने राजदरबार हत्याकाण्डबारे समय–समयमा थप अनुसन्धानको माग उठ्दै आएको छ। तत्कालीन राजा वीरेन्द्रसहित राजपरिवारका सदस्यहरूको ज्यान गएको उक्त घटनाबारे सरकारी छानबिन भए पनि त्यसका निष्कर्षमाथि विभिन्न तहबाट प्रश्न उठ्ने गरेका छन्।