एमालेभित्रैबाट नेतृत्व रूपान्तरणको माग

काठमाडौँ :  नेकपा एमालेभित्र नेतृत्व, नीति र संगठनात्मक संरचनामा व्यापक परिवर्तनको माग गर्दै ‘रूपान्तरण र पुनर्संरचनाका लागि पुनर्जागरण अभियान–२०८२’ सक्रिय बनेको छ। अभियानले पार्टीका नेता-कार्यकर्तालाई अपिल जारी गर्दै एमाले आफ्नो ऐतिहासिक प्रभाव र जनआधार गुमाउने अवस्थामा पुगेको दाबी गरेको छ।

अभियानले आन्तरिक जनवाद कमजोर बन्दै गएको, नेतृत्वमा अहंकार बढेको तथा पछिल्ला निर्वाचनमा व्यहोरेका पराजयको जिम्मेवारी नेतृत्वले नलिएको आरोप लगाएको छ। पुष्पलाल र मदन भण्डारीले अघि सारेको वैचारिक मार्गबाट पार्टी विचलित भएको समेत अपिलमा उल्लेख छ।

पार्टी पुनर्जीवनका लागि अभियानले नेतृत्व परिवर्तन, एउटै पदमा दुई कार्यकालको सीमा, युवा सहभागिता बढाउने व्यवस्था, नेतृत्व चयनमा प्रत्यक्ष निर्वाचन तथा नेतृत्व तहका लागि न्यूनतम स्नातक योग्यता निर्धारण गर्नुपर्ने प्रस्ताव अघि सारेको छ।

अभियानले वर्तमान नेतृत्वलाई पार्टी रूपान्तरणको पहल गर्ने वा इतिहासप्रति जवाफदेही बन्ने विकल्प रोज्न आग्रह गर्दै कार्यकर्ताहरूलाई खुला बहस र सुधारको पक्षमा उभिन आह्वान गरेको छ।