काठमाडौँ : राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत बन्दसत्र आज दिउँसो १ बजेदेखि सुरु हुने भएको छ।
महाधिवेशन प्रतिनिधिको संख्या अपेक्षाभन्दा धेरै बढेपछि उत्पन्न प्राविधिक समस्याका कारण हिजो बन्दसत्र सुरु हुन नसकेको रास्वपाले जनाएको छ।
संसदीय दलका उपनेता गणेश पराजुलीले महाधिवेशन प्रतिनिधिको प्रवेश कार्ड वितरण कार्य सुरु भइसकेको जानकारी दिँदै आवश्यक प्रक्रिया पूरा भएपछि बन्दसत्र सञ्चालन गरिने बताए।
उनका अनुसार सुरुमा २८ सयदेखि ३ हजारसम्म प्रतिनिधि रहने अनुमान गरिए पनि संख्या बढेर ४२ सयभन्दा माथि पुगेपछि व्यवस्थापनमा समस्या देखिएको थियो। ‘केही प्राविधिक त्रुटिका कारण हिजो बन्दसत्र सुरु गर्न सकेनौं,’ उनले भने।
पराजुलीले प्रवेश कार्ड वितरण सम्पन्न भएपछि भोजनावकाशपछि बन्दसत्र सुरु गरिने बताए। उनका अनुसार एक बजेसम्म सबै तयारी पूरा हुने अपेक्षा गरिएको छ।
उनले महाधिवेशन प्रतिनिधि तथा सञ्चारकर्मीलाई भएको असुविधाप्रति क्षमायाचनासमेत गरेका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |