रास्वपा प्रथम महाधिवेशनः पहिलो चरणको मतदान जारी

काठमाडौँ :  राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत नयाँ नेतृत्व चयनका लागि मतदान जारी छ। गएरातिदेखि सुरु भएको मतदानमा हालसम्म १ हजार ६ सयभन्दा बढी प्रतिनिधिले मताधिकार प्रयोग गरिसकेको केन्द्रीय निर्वाचन आयोगले जनाएको छ।

आयोगका प्रमुख भुवन केसीका अनुसार पहिलो चरणअन्तर्गत केन्द्रीय सदस्य चयनका लागि आज दिउँसो १२ बजेसम्म मतदान हुनेछ। ९९ सदस्यीय केन्द्रीय समितिका लागि ३८४ जनाले उम्मेदवारी दिएका छन्। तीमध्ये २१० जना खुलातर्फ र १७४ जना भूगोलतर्फका उम्मेदवार छन्।

भूगोलतर्फ सातै प्रदेशबाट पाँच–पाँच जना गरी ३५ जना निर्वाचित हुने व्यवस्था छ। सुदूरपश्चिमबाट १८, मधेसबाट २०, लुम्बिनी र कर्णालीबाट ३१-३१, कोशीबाट २०, बागमतीबाट २७ तथा गण्डकीबाट २७ जनाको उम्मेदवारी परेको आयोगले जनाएको छ।

चितवनस्थित उद्योग सङ्घको प्रदर्शनी केन्द्रमा भइरहेको मतदानको नतिजा पहिलो चरण सकिएको दुई घण्टाभित्र सार्वजनिक गरिनेछ। त्यसपछि पदाधिकारी चयनका लागि दोस्रो चरणको मतदान सुरु हुनेछ।