काठमाडौँ : नेपाली कांग्रेसको संस्थापनइतर समूहभित्र पार्टी एकताको प्रयास असफल भए वैकल्पिक शक्ति वा संगठन निर्माणको विकल्पसमेत खुला राख्नुपर्ने धारणा बलियो बन्दै गएको छ।
मंगलबार काठमाडौंको चुनदेवीस्थित सम्पर्क कार्यालयमा बसेको १४औँ महाधिवेशनबाट निर्वाचित उपलब्ध सदस्यहरूको बैठकमा सहभागी नेताहरूले पार्टीभित्रको आन्तरिक संकट समाधानका लागि पहिले एकताको अधिकतम प्रयास गर्नुपर्ने, तर त्यसबाट परिणाम ननिस्किए नयाँ राजनीतिक विकल्पबारे निर्णय लिन ढिलाइ गर्न नहुने सुझाव दिएका हुन्।
बैठकपछि नेता मीन विश्वकर्माले पाँच नेताले आफ्नो धारणा राखेको र अधिकांशले लामो अन्योल अन्त्य गर्दै स्पष्ट रणनीति तय गर्नुपर्नेमा जोड दिएको जानकारी दिए। उनका अनुसार नेपालको लोकतान्त्रिक आन्दोलनमा कांग्रेसका अग्रज नेताहरूले पुर्याएको योगदानलाई आत्मसात् गर्दै आवश्यक परे नयाँ ढंगले अघि बढ्ने साहस देखाउनुपर्ने मत पनि बैठकमा आएको थियो।
बैठकले साउन ६ गते मनाइने बीपी स्मृति दिवस भव्य रूपमा आयोजना गर्ने प्रस्ताव अनुमोदन गरेको छ। संस्थापनइतर समूहको बैठक बुधबार पनि जारी रहने जनाइएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |