साताको पहिलो कारोबार दिन सेयर बजारले लगातार पाँचौं दिन पनि सकारात्मक गति कायम राख्दै नेप्से परिसूचक १९ कारोबार दिनपछि २७०० अंकमाथि पुगेको छ। सोमबार नेप्से ४१.७० अंकले बढेर २७१९.२४ विन्दुमा बन्द भएको हो।
बजारसँगै कारोबार रकम पनि बढेको छ। ३४३ कम्पनीको १ करोड २२ लाख ४५ हजार कित्ता सेयर ६७ हजार १५५ पटक किनबेच हुँदा ५ अर्ब ५१ करोड २६ लाख रुपैयाँभन्दा बढीको कारोबार भएको नेपाल स्टक एक्सचेन्जले जनाएको छ। अघिल्लो कारोबार दिन ४ अर्ब ५७ करोड रुपैयाँ बराबरको कारोबार भएको थियो।
एभरेष्ट कलर लिमिटेडको सेयर मूल्य सकारात्मक सर्किट लाग्दै सर्वाधिक बढ्यो भने रिज लाइन इनर्जी र श्रीनगर एग्रिटेक इन्डस्ट्रिजको मूल्य पनि उल्लेख्य उकालो लाग्यो। कारोबार रकमका आधारमा आँखुखोला जलविद्युत कम्पनी अग्रस्थानमा रह्यो। १३ उपसमूहमध्ये १२ उपसमूहको परिसूचक बढ्दा म्युचुअल फन्ड उपसमूह भने सामान्य घट्यो।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |