उषाकिरण नेकपा (बहुमत) बाट निष्कासित

काठमाडौँ :  अखिल (क्रान्तिकारी) का पूर्वमहासचिव उषाकिरण आजादलाई नेकपा (बहुमत) ले पार्टीका सम्पूर्ण जिम्मेवारीबाट निष्कासन गरेको छ।

अध्यक्ष मण्डलका अध्यक्ष कमरेड कञ्चनद्वारा साउन २६ गते जारी प्रेस विज्ञप्ति अनुसार, आजादले पार्टीको विधि, पद्धति र अनुशासन बारम्बार उल्लङ्घन गरेकाले उनलाई केन्द्रीय सदस्यसहित सबै जिम्मेवारीबाट हटाइएको हो।

पार्टी अनुशासन उल्लङ्घन गरेको आरोपमा गत साउन १४ र १५ गते पोखरामा बसेको केन्द्रीय समिति बैठकले उनीमाथि छानबिन प्रक्रिया अघि बढाएको थियो। छानबिनका क्रममा रहेका विषयलाई बेवास्ता गर्दै पार्टीविरुद्ध भ्रम सिर्जना गरेको र अनुशासन उल्लङ्घन जारी राखेको ठहर पार्टीले गरेको छ।

यसअघि अखिल (क्रान्तिकारी) को असार ९ र १० गते बसेको सचिवालय बैठकले संगठनलाई आयोजक समितिमा रूपान्तरण गर्दै विरोधी गतिविधि गरेको आरोपमा आजादलाई संगठनको जिम्मेवारीबाट निलम्बन गरिसकेको थियो।