केपी ओलीको दाबी : ‘बालेन सरकार ५ वर्ष टिक्दैन’

काठमाडौँ :  नेकपा एमालेका अध्यक्ष केपी शर्मा ओलीले बालेन शाह नेतृत्वको सरकार पाँच वर्ष नटिक्ने दाबी गरेका छन्। भक्तपुरको नगरकोटमा आयोजित जनसङ्गठन समन्वय संयन्त्रको कार्यशालालाई सम्बोधन गर्दै ओलीले अराजकता र हुल्याहा प्रवृत्तिको आडमा आएकाहरूलाई देश सुम्पन नसकिने बताए ।

सम्बोधनका क्रममा अध्यक्ष ओलीले देशमा लोकतन्त्र अपहरित भएको र संविधान मिचिएको आरोप लगाए। सामाजिक सञ्जालमा सही कुरा लेख्दा पनि आक्रमण हुने वातावरण बनेको भन्दै उनले त्रासको स्थिति अन्त्य गर्न अपहरित लोकतन्त्र फिर्ता ल्याउनुपर्नेमा जोड दिए। दरबार फालेर गणतन्त्र ल्याएका शक्ति कसैसँग नडराउने उल्लेख गर्दै उनले कुनै पनि आडभरोसामा चलेको शक्तिसामु एमाले नझुक्ने स्पष्ट पारे।

जनतालाई तर्साएर र बाकस साटेर बहुमत देखाउँदैमा पाँच वर्ष लुटमार गर्न नदिइने ओलीको भनाइ थियो। राष्ट्रिय स्वतन्त्र पार्टी (रास्वपा) लाई भोट हालेकोमा जनतामा पश्चात्ताप भइसकेको दाबी गर्दै उनले सरकारको रविविरुद्ध आन्दोलित हुन पार्टीपङ्क्तिलाई तयारी अवस्थामा रहन निर्देशनसमेत दिए।