काठमाडौँ : बिहीबार दिउँसैदेखि निरन्तर भइरहेको वर्षाका कारण काठमाडौँ उपत्यका जोड्ने सबै मुख्य राजमार्ग अवरुद्ध भएका छन्। पहिरोका कारण पृथ्वी राजमार्ग, कान्ति लोकपथ र बीपी राजमार्गमा सवारी साधनको आवतजावत पूर्ण रूपमा ठप्प बनेको छ।
जिल्ला प्रहरी कार्यालय धादिङका अनुसार पृथ्वी राजमार्गको कृष्णभीरसहित आधा दर्जनभन्दा बढी स्थानमा ढुंगासहितको ठूलो पहिरो खसेको छ। भदौ १४ गते त्रिशूली नदीको कटाउनपछि दुई साता लगाएर बनाइएको कृष्णभीर क्षेत्रको डाइभर्सनसमेत पहिरोले पुरिएको छ।
शुक्रबार बिहान ५ बजेदेखि राजमार्ग खोल्ने तयारी गरिए पनि निरन्तरको वर्षा र पहिरो खस्ने क्रम नरोकिएकाले अब राजमार्ग अनिश्चितकालका लागि बन्द भएको छ। कान्ति लोकपथ र बीपी राजमार्ग पनि ठप्प हुँदा उपत्यका भित्रिने र बाहिरिने हजारौँ यात्रुहरू बाटोमै पत्रुपमा परेका छन्। वर्षा जारी रहेकाले पहिरो पन्छाउन कठिन भइरहेको प्रहरीले जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |