काठमाडौँ : जल तथा मौसम विज्ञान विभागले असोज ९ देखि ११ गतेसम्म देशका विभिन्न स्थानमा हावाहुरी, मेघगर्जन र चट्याङ्गसहित अति भारी वर्षाको सम्भावना रहेको भन्दै विशेष मौसम बुलेटिन जारी गरेको छ।
उत्तर अन्डमान सागर र बङ्गालको खाडीमा बनेको न्यून चापीय प्रणाली शक्तिशाली हुँदै पश्चिम(उत्तरपश्चिम सर्न लागेकाले नेपालमा यसको प्रत्यक्ष प्रभाव पर्ने विभागले जनाएको छ। यस प्रणालीका कारण बुधबारदेखि नै वर्षाको गतिविधि बढ्ने र असोज ९ गते शुक्रवारदेखि ११ गते आइतवारसम्म गण्डकी र लुम्बिनी प्रदेशका धेरै स्थानमा धेरै भारीदेखि अति धेरै भारी वर्षा हुने अनुमान छ।
यसैगरी कोशी, मधेश, बागमती, सुदूरपश्चिम र कर्णालीका थोरै स्थानहरूमा पनि भारीदेखि धेरै भारी वर्षाको सम्भावना छ। हिमाली क्षेत्रमा भारी हिमपात हुनसक्ने भएकाले पर्वतारोहीहरूलाई पूर्वतयारी र सतर्कता अपनाउन भनिएको छ।
विभागले बाढी, पहिरो, शहरी क्षेत्रमा डुबान, नदीको सतह बढ्ने तथा यातायात र कृषि क्षेत्र प्रभावित हुनसक्ने भएकाले सर्वसाधारण र सरोकारवाला निकायलाई उच्च सजगता अपनाउन आग्रह गरेको छ। साथै, धानबाली भित्र्याउने क्रममा रहेका किसानलाई कृषि विज्ञको परामर्श लिएर मात्र काम अघि बढाउन सुझाव दिइएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |