काठमाडौं : नेपाल लोकतान्त्रिक वैदेशिक रोजगार व्यवसायी एशोसिएसनले मलेसिया रोजगारीमा ‘सिन्डिकेट’ गर्ने प्रयासबारे गम्भीर ध्यानाकर्षण गराएको छ।
एशोसिएसनका अध्यक्ष दीपक थापाले शुक्रबार जारी विज्ञप्तिमा श्रम बजारमा स्वस्थ प्रतिस्पर्धा र पारदर्शिता कायम गर्नुपर्ने उल्लेख गर्दै केही व्यक्तिहरूले मलेसिया रोजगारीलाई पुनः सिन्डिकेटतर्फ लैजाने गतिविधि सुरु गरेको आरोप लगाएका छन्।
विगतमा देखिएका अव्यवस्थित र गैरजिम्मेवार अभ्यासका कारण नेपाली श्रमिकलाई ठूलो मूल्य चुकाउनु परेको अनुभव दोहोरिन नदिन श्रम, रोजगार तथा सामाजिक सुरक्षा मन्त्रालय र सम्बन्धित निकायले निगरानी र कडाइ गर्न आवश्यक देखिएको विज्ञीितमा उल्लेख छ ।
एशोसिएसनले श्रमिक पठाउने प्रक्रियामा सबै वैदेशिक रोजगार व्यवसायीबीच समान अवसर सुनिश्चित गर्न माग गर्दै मलेसिया रोजगारीमा एकाधिकार वा सीमित समूहको नियन्त्रण हुने प्रवृत्ति रोक्न आग्रह गरेको छ।
विज्ञप्तिमा मन्त्रालय, वैदेशिक रोजगार विभाग, व्यवसायी संघ–संस्था तथा सरोकारवालालाई निष्पक्ष र व्यवस्थित प्रक्रिया अपनाउन समेत आह्वान समेत गरिएको छ।
