काठमाडौं : भंसार एजेन्ट महासंघ नेपालले नयाँ भंसार ऐनका आधारमा भंसार विभागले तयार गर्दै गरेको नियमावलीमा सुझाव संकलनका उद्देश्यले शुक्रबार बृहत् राष्ट्रिय भेलाको आयोजना गरेको छ। भेलामा देशभरका भंसार एजेन्टहरूको उपस्थितिमा हक–हितका विषयदेखि राष्ट्रिय अर्थतन्त्र सुदृढीकरणमा एजेन्टहरूको भूमिकाबारे छलफल गरिएको थियो।
भेला सहभागी वक्ताहरूले देशको कुल राजस्वको करिब ५० प्रतिशत हिस्सा भंसार प्रशासनबाट संकलन हुने भएकाले एजेन्टहरूको जिम्मेवारी र उत्तरदायित्व अत्यन्त महत्वपूर्ण रहेको बताएका छन्। व्यापार सहजीकरण, राजस्व संकलन, चुहावट नियन्त्रण र छुट–बेरुजु असुलीमा एजेन्टहरूको भूमिका अन्तर्राष्ट्रिय अभ्यासअनुसार पनि सशक्त र अपरिहार्य हुने उनीहरूको भनाइ थियो।
विगतमा माओवादी द्वन्द्व, कोभिड–१९ महामारी र हालैको जेन जेड आन्दोलनले अर्थतन्त्रमा पारेको असरका बीच भंसार राजस्वले राज्यको आम्दानीमा निरन्तर टेवा पुर्याइरहेको वक्ताहरूको भनाइ थियो। सम्भावित द्वन्द्व वा अस्थिर अवस्थाका बीच पनि राजस्व संकलनलाई सुदृढ बनाउनेतर्फ एजेन्टहरूको परिचालन आवश्यक रहेको उनीहरूले बताएका छन्।
भंसार विभागले ल्याउन लागेको नयाँ नियमावली एजेन्टहरूलाई ‘च्याप्ने’ होइन, ‘सहयोगी’को रूपमा लिने खालको हुनुपर्नेमा भेलामा सहभागी सबैको साझा धारणा रहेको महासंघले जनाएको छ।
भेला महासंघका अध्यक्ष प्राचीन थैवको अध्यक्षतामा सम्पन्न भएको थियो। कार्यक्रममा संस्थापक अध्यक्ष जयप्रसाद सिवाकोटी, निवर्तमान अध्यक्ष भरतराज घिमिरे, र अन्य पदाधिकारीहरूको उपस्थिति थियो। जिल्ला अध्यक्षहरू र विभिन्न भंसार नाकाका प्रतिनिधिहरूले आ–आफ्ना क्षेत्रका सुझावहरू प्रस्तुत गर्दै राजस्व संकलन र आर्थिक व्यवस्थापनमा सहयोगी भूमिका निर्वाह गर्ने प्रतिबद्धता जनाएका थिए।
