दाङको बेलझुुण्डीमा धार्मिक चहलपहल: झाँसी र गोरखपुरका प्रतिष्ठित सन्तद्वारा गौशालाको अवलोकन

दाङ, बेलझुण्डी
दाङको बेलझुण्डीस्थित श्री योगी आदित्यनाथ फाउण्डेशन गाई संरक्षण केन्द्र मा पछिल्लो समय धार्मिक विशिष्टता थपिँदै गएको छ। यसै क्रममा भारतका प्रख्यात धार्मिक स्थलहरूबाट आएका प्रतिष्ठित सन्तहरूले गौशालाको अवलोकन तथा निरीक्षण गर्नुभएको छ। गौ माताको संरक्षण र संवर्द्धनमा सक्रिय यस केन्द्रमा हालै बागेश्वर धाम (झाँसी) बाट आउनुभएका महन्त श्री योगी सत्यनाथ जी र गोरखपुरस्थित गोरखानाथ मन्दिर का पण्डित रमेश चन्द पाठक ज्यू ले विशेष भ्रमण गर्नुभएको छ।

भ्रमणका क्रममा उहाँहरूले फाउण्डेशनले गरिरहेको गाई संरक्षणको कार्यलाई नजिकबाट नियाल्नुभयो। अवलोकनपछि सन्तहरूले सनातन धर्ममा गौ माताको महत्त्व दर्शाउँदै बेलझुण्डीमा सञ्चालित यो अभियानको उच्च प्रशंसा गर्नुभयो। “गौ सेवा नै वास्तविक राष्ट्र सेवा हो” भन्दै उहाँहरूले फाउण्डेशनले गरिरहेको निस्वार्थ कार्यले समाजमा सकारात्मक सन्देश प्रवाह गर्ने विश्वास व्यक्त गर्नुभयो। यस भ्रमणको अर्को महत्त्वपूर्ण पाटो भनेको आगामी दिनमा चर्चित कथा वाचक पण्डित धीरेन्द्र कृष्ण शास्त्री (बागेश्वर धाम सरकार) को सम्भावित आगमन हो। फाउण्डेशनका अनुसार, बागेश्वर बाबाले यस गौ संरक्षण केन्द्रको अवलोकन र धार्मिक प्रवचनका लागि दाङ आउने इच्छा व्यक्त गर्नुभएको छ। उहाँको आगमनले दाङ र समग्र राप्ती अंचलकै धार्मिक पर्यटनमा ठूलो टेवा पुग्ने अपेक्षा गरिएको केन्द्रका संस्थापक अध्यक्ष अनिल विष्टले जानकारी दिनुभयो।
श्री योगी आदित्यनाथ फाउण्डेशनले गाईहरूको संरक्षण मात्र नभई यस क्षेत्रलाई एक पवित्र धार्मिक र आध्यात्मिक केन्द्र को रूपमा विकास गर्ने लक्ष्य राखेको छ। भारतका प्रख्यात पीठहरूबाट भइरहेको यो उच्चस्तरीय भ्रमणले फाउण्डेशनको मनोबल अझ उच्च बनाएको छ।