काठमााडौँ : राष्ट्रिय स्वतन्त्र पार्टीले सांगठनिक सुदृढीकरण र आगामी अधिवेशनको कार्यतालिका तय गर्न आज सचिवालय बैठक आह्वान गरेको छ। बैठक साँझ ६ बजे वनस्थलीस्थित पार्टी केन्द्रीय कार्यालय घन्टीघरमा बस्ने तय भएको छ।
पार्टीका पछिल्ला गतिविधि र सांगठनिक विवाद सुल्झाउन निर्णायक मानिएको यस बैठकका लागि ६ वटा मुख्य एजेन्डा तय गरिएको रास्वपा स्रोतले जनाएको छ। बैठकको मुख्य आकर्षणका रूपमा ुजिल्ला समितिहरूको विघटनु लाई हेरिएको छ। पार्टीले संगठनलाई नयाँ स्वरूपमा लैजान हाल कायम रहेका जिल्ला समितिहरू खारेज गर्ने वा स्वरूप परिवर्तन गर्नेबारे सचिवालयबाटै अन्तिम निर्णय गर्ने तयारी गरेको छ।
बैठकमा पार्टीको आगामी भेला तथा अधिवेशनको विशेष कार्यतालिकाबारे समेत विस्तृत छलफल हुने बताइएको छ। नयाँ दल भएकाले संगठनलाई वडा तहसम्म प्रभावकारी बनाउन अधिवेशनको मिति र प्रक्रियाबारे सचिवालयले ठोस खाका तयार पार्ने अपेक्षा गरिएको छ।
यसैगरी, पार्टीका विभिन्न आयोग र विभागहरूमा रिक्त रहेका पदाधिकारीहरूको मनोनयन प्रक्रियालाई पनि आजको बैठकले टुङ्गो लगाउने बताइएको छ। लामो समयदेखि कतिपय विभागहरू नेतृत्वविहीन हुँदा कार्यसम्पादनमा असर पुगेको भन्दै पदाधिकारी नियुक्तिको विषयलाई एजेन्डामा राखिएको हो।
पार्टीभित्र बढ्दो अनुशासनहीनतालाई मध्यनजर गर्दै अनुशासनात्मक कारबाहीको विषयमा पनि सचिवालयमा छलफल हुनेछ। केही नेता तथा कार्यकर्तामाथि लागेका आरोप र अनुशासन उल्लंघनका घटनामाथि छानबिन गरी कारबाहीको निर्णय हुनसक्ने स्रोतको दाबी छ।
आजको सचिवालय बैठकले आगामी केन्द्रीय समिति बैठकको मिति तय गर्नुका साथै समसामयिक राजनीतिक विषय र विविध एजेन्डामा छलफल गर्नेछ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |