मोहन डाँगीको नेतृत्वमा इप्पानमा नयाँ कार्यसमिति चयन

काठमाडौँ :  मोहन डाँगीको नेतृत्वमा स्वतन्त्र ऊर्जा उत्पादकहरूको संस्था नेपाल (इप्पान) को नयाँ कार्यसमिति गठन भएको छ। कोषाध्यक्ष पदबाहेक अन्य सबै पदमा सहमति जुटेपछि अधिकांश पदाधिकारी र सदस्य निर्विरोध चयन भएका हुन्।

शुक्रबार सम्पन्न वार्षिक साधारणसभामा वरिष्ठ उपाध्यक्षसहित विभिन्न पदमा उत्तरकुमार लामा र बलराम खतिवडा पक्षबीच प्रतिस्पर्धाको तयारी भए पनि अन्तिम समयमा सहमति भएपछि निर्वाचन टरेको थियो। विधानअनुसार यसअघि वरिष्ठ उपाध्यक्ष रहेका डाँगी स्वतः अध्यक्ष बनेका हुन्।

कोषाध्यक्ष पदमा भने निर्वाचन हुँदा शंकर बस्याल २६७ मतसहित विजयी भए। उनका निकटतम प्रतिस्पर्धी मिथुन चक्रवतीप्रसाद पौडेलले ८२ मत पाए।

नयाँ कार्यसमितिको वरिष्ठ उपाध्यक्षमा उत्तम लामा चयन भएका छन्। उपाध्यक्षमा उत्तरकुमार श्रेष्ठ, नरेन्द्रबल्लभ पन्त, सुसन कर्माचार्य, विक्रम विष्ट र हिमप्रसाद पाठक निर्विरोध निर्वाचित भए। महासचिवमा टेकनाथ आचार्य तथा उपमहासचिवमा कविता पोखरेल चयन भएका छन्। सचिव र सदस्य पदमा पनि सहमतिमार्फत उम्मेदवारहरू निर्विरोध निर्वाचित भएका छन्।