कृषकलाई प्रविधि बुझाएर लागत घटाउन नमोबुद्ध नगर प्रमुखको जोड

काभ्रे :  नमोबुद्ध नगरपालिकाका प्रमुख कुनसाङ लामाले चुनावी प्रतिवद्धता र स्थानीय आवश्यकताका आधारमा कृषि क्षेत्रलाई पहिलो प्राथमिकतामा राखिएको बताएका छन् । नगरपालिकाद्वारा आयोजित तीन दिने कृषि प्रविधि सम्बन्धी तालिमको क्रममा बोल्दै प्रमुख लामाले नगरका ११ वटै वडामा कृषि प्रवर्द्धनका कार्यक्रमलाई फराकिलो बनाउँदै लगिने बताए ।

पछिल्लो समय रासायनिक मलको समस्या र प्रयोगबारे कृषकहरू अन्योलमा रहेको भन्दै उनले प्रविधिको सही सदुपयोग गर्न जोड दिए । ‘अहिले डीएपी मलको अभाव भन्दा पनि यसको सही प्रयोग कसरी गर्ने भन्ने प्राविधिक ज्ञान कृषकमा हुन जरुरी छ’- नगरप्रमुख लामाले भने, ‘चार बोरा लाग्ने ठाउँमा प्रविधि बुझेर दुई बोरा मात्रै मिसाएर हाल्न सकियो भने लागत पनि घट्छ र उत्पादन पनि राम्रो हुन्छ’ । उनले कृषकहरूलाई लाज र डर मानेर नबसी आफ्नै नगरपालिका ठानेर सेवा र प्रविधिबारे खुलेर माग गर्न आग्रह गरे ।

स्थानीय तहले गर्ने यस्ता तालिम र अभिमुखीकरण कार्यक्रमलाई कतिपयले बजेट सिध्याउने खेलका रूपमा मात्रै बुझ्ने गरेको प्रति लक्षित गर्दै उनले असन्तुष्टि समेत पोखे । विद्यालयमा विद्यार्थी सिक्न गएजस्तै कृषक र स्थानीय प्रतिनिधि पनि नगरको समृद्धिका लागि निरन्तर सिक्ने प्रक्रियामा रहनुपर्ने उनको भनाइ थियो ।

कृषिसँगै नगरपालिकाले स्वास्थ्य, खानेपानी, वातावरण संरक्षण र ट्राफिक सचेतनाका लागि सडक नाटक जस्ता विविध सचेतनामूलक कार्यक्रमहरू सञ्चालन गरिरहेको उनले जानकारी दिए । नगरवासीको माग र आवश्यकता अनुसार तीन दिने तालिम पर्याप्त नभए आगामी दिनमा थप बजेट र समय छुट्याएर ११ वटै वडाका कृषकहरू समेट्ने गरी पुनः कार्यक्रम सञ्चालन गरिने आश्वासन समेत उनले दिए ।