काठमाडौं : पूर्वराष्ट्रपति विद्या भण्डारीले बदलिँदो समयअनुसार नीति, नेतृत्व, संगठन र कार्यशैलीमा रूपान्तरण नगरे कम्युनिस्ट आन्दोलनले जनविश्वास पुनः प्राप्त गर्न नसक्ने बताएकी छन्।
जननेता मदन भण्डारीको ७५औँ जन्मजयन्तीका अवसरमा आइतबार आयोजित कार्यक्रममा उनले कम्युनिस्ट आन्दोलनको भविष्य सिद्धान्तको यान्त्रिक पुनरावृत्तिमा नभई समयानुकूल, उत्तरदायी र परिणाममुखी राजनीतिक अभ्यासमा निर्भर रहने धारणा राखिन्।
भण्डारीले हालैको प्रतिनिधिसभा निर्वाचन परिणामले कम्युनिस्ट शक्तिलाई आत्मसमीक्षा र जनसम्बन्ध सुदृढ गर्ने अवसर दिएको उल्लेख गर्दै एउटै निर्वाचनका आधारमा आन्दोलनको सान्दर्भिकताबारे निष्कर्ष निकाल्न नहुने बताइन्। मदन भण्डारीले औंल्याएको ‘रचनात्मकताको अभाव’ अहिले पनि आन्दोलनको मूल चुनौती रहेको उनको भनाइ थियो। युवा पुस्ताको आकांक्षा, डिजिटल युगका चुनौती, गुणस्तरीय शिक्षा, रोजगारी, स्वास्थ्य, सुशासन, उत्पादनमुखी अर्थतन्त्र र राष्ट्रिय आत्मनिर्भरताका विषयमा नयाँ दृष्टिकोणसहित प्रभावकारी कार्यान्वयन गर्न सके मात्रै कम्युनिस्ट आन्दोलनलाई सुदृढ र लोकप्रिय बनाउन सकिने उनले जोड दिइन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |