काठमाडौँ : त्रिपुरेश्वरस्थित राहदानी विभाग परिसरमा पार्किङ विवादपछि एक युवाले आत्मदाहको प्रयास गरेका छन्।
मुगुका २५ वर्षीय गणेश नेपालीले आत्मदाहको प्रयास गरेको प्रहरीले जनाएको छ । नेपालीले राहदानी विभागको ३ नम्बर गेट नजिक आफ्नो मोटरसाइकल पार्किङ गरेका थिए। काठमाडौं महानगरपालिकाको नगरप्रहरीले जथाभावी पार्किङ गरेको भन्दै मोटरसाइकलमा ह्वील लक लगाएपछि उनी आक्रोशित बनेका थिए। त्यसलगत्तै उनले आफ्नै मोटरसाइकलबाट पेट्रोल निकालेर शरीरमा छर्किएर आगो लगाएका हुन्।
स्थानीय र सुरक्षाकर्मीले तत्काल आगो निभाएर उनलाई उद्धार गरेका थिए। घाइते नेपालीलाई उपचारका लागि वीर अस्पताल लगिएको छ। अस्पताल स्रोतका अनुसार उनको अवस्था अहिले सामान्य छ।
काठमाडौं उपत्यका प्रहरी कार्यालयका प्रवक्ता एसपी पवनकुमार भट्टराईले घटनाको प्रारम्भिक कारण पार्किङसम्बन्धी विवाद देखिए पनि आत्मदाह प्रयासका पछाडिका अन्य कारणबारे थप अनुसन्धान भइरहेको बताए। घटनापछि राहदानी विभाग परिसरमा केही समय तनावको अवस्था सिर्जना भएको थियो।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |