गणेश नेपाली आत्मदाह प्रकरण : डिआइजी थपलियाको नेतृत्वमा छानबिन समिति

काठमाडौँ : गणेश नेपालीको आत्मदाह प्रकरणले राजनीतिक र सार्वजनिक चासो बढिरहेका बेला सरकारले त्यसको छानबिन गर्न पाँच सदस्यीय समिति गठन गरेको छ।

घटनामा सुरक्षाकर्मीको भूमिकामाथि प्रश्न उठेपछि सरकारले डिआइजी गोविन्द थपलियाको नेतृत्वमा समिति बनाएको हो। प्रतिनिधिसभाको शुक्रबारको बैठकमा गृहमन्त्री सुधन गुरुङले समितिले घटनाको निष्पक्ष अनुसन्धान गरी प्रतिवेदन बुझाउने जानकारी दिए। उनका अनुसार घटनासँग सम्बन्धित प्रारम्भिक अनुसन्धानका क्रममा तीन जना महानगर प्रहरीलाई सोधपुछका लागि नियन्त्रणमा लिइएको छ।

गृहमन्त्री गुरुङले घटनाको सत्यतथ्य बाहिर ल्याउन सरकार प्रतिबद्ध रहेको बताउँदै दोषी देखिने जोसुकैमाथि कानुनबमोजिम कारबाही गरिने स्पष्ट पारे। आत्मदाह प्रयासको घटनापछि संसद्, राजनीतिक दल र नागरिक समाजबाट निष्पक्ष छानबिन र जिम्मेवारमाथि कारबाहीको माग उठ्दै आएको छ। सरकारले गठन गरेको समितिले घटनाको कारण, सुरक्षाकर्मीको भूमिका र समग्र परिस्थितिबारे विस्तृत अध्ययन गरी प्रतिवेदन पेश गर्ने अपेक्षा गरिएको छ।