काठमाडौँ : प्रधानमन्त्री बालेन्द्र शाहले पुँजी बजार र धितोपत्र व्यवसायमा देखिएका समस्या समाधान गरी लगानीमैत्री वातावरण बनाउन सरकार प्रतिबद्ध रहेको बताएका छन्। सोमबार सिंहदरबारमा सरोकारवाला निकाय र व्यवसायीसँग भएको छलफलमा उनले सम्बन्धित निकायलाई तत्काल आवश्यक काम अघि बढाउन निर्देशनसमेत दिएका छन्।
प्रधानमन्त्रीले व्यवसायीका जायज माग कार्यान्वयनका लागि सम्बन्धित निकायसँग समन्वय गरी आवश्यक निर्णय लिइने बताए। छलफलमा सहभागी नेपाल उद्योग वाणिज्य महासंघअन्तर्गतको पुँजी बजार समितिका सभापति प्रियराज रेग्मीका अनुसार नयाँ समिति गठनभन्दा सम्बन्धित निकायले तत्काल काम सुरु गर्ने आश्वासन प्रधानमन्त्रीले दिएका हुन्।
छलफलमा लगानीकर्ताको मनोबल बढाउने, कर प्रणालीमा स्पष्टता ल्याउने, ब्रोकरमार्फत मार्जिन लेन्डिङ सञ्चालन गर्ने, स्टक एक्सचेन्जलाई प्रविधिमैत्री बनाउने तथा धितोपत्र बोर्डले १० कित्ते नीतिको पुनरावलोकन गरी बुक बिल्डिङमार्फत आईपीओ निष्कासनको व्यवस्था गर्न सुझाव दिइएको थियो। बैठकमा धितोपत्र बोर्ड, नेपाल स्टक एक्सचेन्ज र स्टक ब्रोकर एसोसिएसनका प्रतिनिधिको सहभागिता थियो।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |