काठमाडौं : सम्पत्ति शुद्धीकरण अनुसन्धान विभागले आर्थिक वर्ष २०८२/८३ मा सातवटा सम्पत्ति शुद्धीकरण मुद्दा दायर गर्दै १२१ जनालाई प्रतिवादी बनाएको छ। विभागले उनीहरूविरुद्ध करिब १ खर्ब १८ अर्ब ५ करोड रुपैयाँ बराबरको बिगो दाबी गरेको जनाएको छ।
बिहीबार सार्वजनिक वार्षिक विवरणअनुसार विभागमा प्राप्त सम्पत्ति शुद्धीकरण तथा आतङ्कवादी क्रियाकलापमा वित्तीय लगानीसम्बन्धी सूचनालाई स्क्रिनिङ कमिटीबाट समीक्षा गरी आवश्यक देखिए प्रारम्भिक अनुसन्धान अघि बढाइन्छ। त्यसका लागि अनुसन्धान अधिकृत तोकी कानुनी प्रक्रिया अगाडि बढाउने व्यवस्था रहेको विभागले जनाएको छ।
विभागमा अनुसन्धान तथा अभियोजनका लागि चार अनुसन्धान शाखासहित कानुन तथा परामर्श इकाई, प्रशासन तथा योजना शाखा, अनुसन्धान समन्वय शाखा र प्रहरी शाखा सञ्चालनमा छन्।
राजस्व चुहावट, भन्सार, अन्तःशुल्क, व्यापारसम्बन्धी मनी लाउन्डरिङ तथा सम्पत्ति शुद्धीकरण कसुरको अनुसन्धान गर्दै आएको विभागले पछिल्ला वर्षमा अध्ययन, अनुसन्धान र अभियोजन प्रक्रियालाई थप प्रभावकारी र तीव्र बनाएको जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |