काठमाडौँ : वीरगञ्जस्थित नारायणी अस्पतालमा कार्यरत चिकित्सक तथा स्वास्थ्यकर्मीमाथि भएको सामूहिक आक्रमण र अस्पतालमा भएको तोडफोडको विरोधमा नेपाल चिकित्सक संघले बुधबार पनि देशभर आकस्मिक सेवाबाहेकका स्वास्थ्य सेवा बन्द गरेको छ।
घटनामा संलग्नमाथि कडा कानुनी कारबाही नभएको भन्दै संघले मंगलबारदेखि चरणबद्ध आन्दोलन सुरु गरेको हो। आन्दोलनअन्तर्गत आज बिहान १० बजे काठमाडौंको माइतीघर मण्डलामा चिकित्सक तथा स्वास्थ्यकर्मीले विरोध प्रदर्शन गर्दै सरकारको ध्यानाकर्षण गराउने कार्यक्रम रहेको छ।
काठमाडौं बाहिरका जिल्लामा भने प्रमुख जिल्ला अधिकारीमार्फत ज्ञापनपत्र बुझाउने, स्वास्थ्य संस्थामै धर्ना दिने तथा विरोध प्रदर्शन गर्ने कार्यक्रम तय गरिएको संघले जनाएको छ।
चिकित्सक संघले नारायणी अस्पताल घटनाका दोषीलाई तत्काल कानुनी दायरामा ल्याई कडा कारबाही गर्न, स्वास्थ्यकर्मीको सुरक्षा सुनिश्चित गर्न तथा अस्पतालमा हुने हिंसात्मक गतिविधि रोक्न प्रभावकारी कदम चाल्न सरकारसँग माग गरेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |