काठमाडौँ : सरकारले दुर्गा प्रसाईं नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानुले अघि सारेका माग सम्बोधनका लागि औपचारिक वार्ता टोली गठन गरेको छ।
प्रधानमन्त्री तथा मन्त्रिपरिषद् कार्यालयका सहसचिव लीलाधर सुवेदीको संयोजकत्वमा वार्ता टोली गठन गरिएको प्रवक्ता हेमराज अर्यालले जानकारी दिए। टोलीमा गृह मन्त्रालयका सहसचिव आनन्द काफ्ले, अर्थ मन्त्रालयका सहसचिव महेश आचार्य र भूमि व्यवस्था, सहकारी तथा सामान्य प्रशासन मन्त्रालयका सहसचिव डिलाराम पन्थी सदस्य छन्।
सोमबार जिल्ला प्रशासन कार्यालय ललितपुरका प्रमुख जिल्ला अधिकारी नरहरि घिमिरेको कार्यकक्षमा भएको छलफलपछि सरकारी वार्ता टोली गठन गर्ने सहमति भएको हो।
महाअभियानले गत साउन २९ गते राष्ट्रिय मानव अधिकार आयोगमार्फत सरकारसमक्ष आफ्ना माग बुझाएको थियो। सरकारको आह्वानलाई सकारात्मक रूपमा लिँदै महाअभियानका तर्फबाट विष्णु बोहोरा क्षेत्री, राजु आचार्य, सकुनी सिंहलगायत प्रतिनिधिले सोमबारै वार्ताको औपचारिक पत्र ग्रहण गरेका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |