गाउँ पर्यटन प्रवर्द्धन मञ्चद्वारा रसुवामा रोपाइँ महोत्सव

रसुवा :  परम्परागत कृषिसंस्कृति र गाउँ पर्यटन प्रवर्द्धनको उद्देश्यले २२औँ राष्ट्रिय धान दिवस रसुवाको कालिका गाउँपालिकास्थित जिबजिबेमा भव्य रूपमा मनाइएको छ।

‘समुन्नत नेपालको प्राथमिक आधार, पर्यटन र कृषि नेपाली अर्थतन्त्रका जराधार’ भन्ने नारासहित आयोजना गरिएको रोपाइँ महोत्सवमा स्थानीयबासी, किसान, जनप्रतिनिधि र पर्यटकको उल्लेख्य उपस्थिति थियो। सिमसिमे वर्षातबीच गाला भरि धानका माला, निधारमा हिलोको टीका र हातमा हरियो बिउ बोकेर खेत पसेका सहभागीहरूको उत्साहले महोत्सव थप जीवन्त बनायो। कोही रमाइलो गर्न त कोही साँच्चिकै ुमानो रोपेर मुरी फलाउनेु उद्देश्यले हिलोमा रमाएका थिए।

गाउँ पर्यटन प्रवर्द्धन मञ्च नेपाल र कालिका गाउँपालिकाको संयुक्त आयोजनामा तथा नेपाल पर्यटन बोर्डको प्रवर्द्धनमा सम्पन्न कार्यक्रमले कृषि र पर्यटनलाई जोड्ने पहलस्वरूप रोपाइँ, असारे भाका, दहीचिउरा भोज र स्थानीय उत्पादन प्रदर्शन जस्ता कार्यक्रम समेटिएको थियो।

कार्यक्रमका प्रमुख अतिथि तथा रसुवाका सांसद मोहन आर्चायले युवालाई कृषि र पर्यटनसँग जोड्नुपर्नेमा जोड दिँदै रोजगारी सिर्जना गरी युवा पलायन रोकिनुपर्ने बताए। उनले लाङटाङ र गोसाइँकुण्ड क्षेत्रको धार्मिक पर्यटन प्रवर्द्धन तथा पूर्वाधार सुधारका लागि पहल गर्ने प्रतिबद्धता जनाए।

कालिका गाउँपालिकाका अध्यक्ष हरिकृष्ण देबकोटाले कृषि आत्मनिर्भरता र रैथाने खाद्य उत्पादनबाट विदेशी पर्यटक आकर्षित गर्न सकिने उल्लेख गरे। कृषि र पर्यटनलाई एकसाथ जोडेर युवालाई आयआर्जन र रोजगारमा जोड्न सकिने उनको भनाइ थियो।

कार्यक्रममा स्थानीय भजन समूहहरूले असारे भाका गाएर मलखाद र बीउको समयमै उपलब्धताको माग गरे। प्रतियोगितात्मक असारे भाका कार्यक्रममा विजयी समूहलाई नगद र प्रमाणपत्रसहित सम्मान गरिएको थियो।

गाउँ पर्यटन प्रवर्द्धन मञ्च नेपालकी अध्यक्ष सकुन्तला देबकोटाको अध्यक्षतामा सम्पन्न कार्यक्रममा राजनीतिक दलका प्रतिनिधि, कृषि विज्ञ तथा सरोकारवाला निकायका व्यक्तिहरूको पनि उपस्थिति रहेको थियो। मञ्चले आगामी दिनमा आन्तरिक तथा बाह्य पर्यटन प्रवर्द्धन गर्न यस्ता कार्यक्रमलाई निरन्तरता दिने जनाएको छ।