काठमाडौँ : नेपाल प्रहरीका महानिरीक्षक (आईजीपी) दानबहादुर कार्कीले आफूविरुद्ध सार्वजनिक लेखा समितिमा लगाइएको अनियमितताको आरोपप्रति आपत्ति जनाउँदै संसदीय मर्यादा कायम राख्न आग्रह गरेका छन्। रास्वपाका सांसद खगेन्द्र सुनारले प्रहरीको पोशाक खरिदमा अनियमितता भएको आरोप लगाउँदै कार्कीलाई जिम्मेवारीबाट हटाएर छानबिन गर्नुपर्ने माग गरेपछि कार्कीले जवाफ फर्काएका हुन् ।
संसदीय समितिमा आफूलाई जथाभाबी आरोप लगाइएको भन्दै कार्कीले निष्ठापूर्वक काम गरिरहेका व्यक्तिलाई हुर्मत लिने ढंगले प्रस्तुत गर्नु उचित नभएको बताए। उनले ‘प्रहरीलाई घिसार्छु’ भन्ने अभिव्यक्ति सुन्दा ‘पाषाणयुगीन मानसिकता बोकेका मान्छेबाट शासित हुँदैछौँ कि’ भन्ने चिन्ता लागेको टिप्पणी गरे।
उजुरी परेका विषयमा अनुसन्धान र सोधपुछ हुनुपर्नेमा आफूहरूको पनि सहमति रहेको उनले बताए। तर त्यसका लागि संसदीय अभ्यासभित्रै व्यवस्थित प्रक्रिया रहेको उनको भनाइ थियो।
‘गालीगलौज गर्ने’ प्रवृत्तिले सभ्य र संसदीय अभ्यासलाई राम्रो नबनाउने भन्दै कार्कीले प्रहरी मुलुकको प्रतिपक्ष नभएको पनि स्मरण गराए।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |