बीमा समूहको साथमा सेयर बजार सामान्य सुधार

काठमाडौं : साताको चौथो कारोबार दिन बुधबार नेपाल स्टक एक्सचेन्ज (नेप्से) परिसूचक २.६६ अंकले बढेर २ हजार ७८०.२५ विन्दुमा पुगेको छ। अघिल्लो दिनको सकारात्मक प्रवृत्तिलाई निरन्तरता दिँदै बजार हरियालीमा बन्द भएको हो।

यस दिन ३४७ कम्पनीका १ करोड ३५ लाख २१ हजार कित्ता शेयर ६२ हजार १४८ पटक किनबेच हुँदा ५ अर्ब ७३ करोड ८१ लाख रुपैयाँबराबरको कारोबार भएको छ। मंगलबारको तुलनामा कारोबार रकम पनि बढेको छ।

समूहगत रूपमा निर्जीवन बीमा उपसमूह ३.३७ प्रतिशत र जीवन बीमा उपसमूह डेढ प्रतिशतभन्दा बढीले बढेपछि बजारलाई टेवा पुगेको हो। १३ उपसमूहमध्ये ७ समूह बढ्दा ६ समूह घटेका छन्।

कालिञ्चोक हाइड्रोपावरको शेयर सकारात्मक सर्किट लाग्दै सर्वाधिक बढ्यो। कारोबार रकमका आधारमा आँखीखोला जलविद्युत कम्पनी अग्रस्थानमा रहँदा नेपाल पुनर्बीमा कम्पनी र रिडी पावर पनि उच्च कारोबार हुने कम्पनीमा परेका छन्। नेपाल पुनर्बीमा कम्पनीको शेयर मूल्य भने ५.१८ प्रतिशतले घटेको छ।