काठमाडौं : मधेश प्रदेशमा नयाँ सरकार गठन असंवैधानिक भएको भन्दै विपक्षी दलहरू अदालत जाने भएका छन्।
सोमबार बसेको गठबन्धनको बैठकले संविधानको धारा १६८(२) अनुसार आह्वान नगरी उपधारा (३) अन्तर्गत मुख्यमन्त्री नियुक्त गरिएको भन्दै आपत्ति जनाएको हो। जनमत पार्टीका महासचिव चन्दन सिंहका अनुसार मंगलबार बिहान अदालत खुल्नेबित्तिकै रिट दायर गरिनेछ। रिट दलको हैसियतमा नभई सांसदहरूको व्यक्तिगत तर्फबाट दायर गर्ने तयारी गरिएको र ७८ सांसदको हस्ताक्षर संकलन भइसकेको उनले बताए।
प्रदेश प्रमुख सुमित्रा सुवेदी भण्डारीले आइतबार एमाले संसदीय दलका नेता सरोजकुमार यादवलाई बर्दिबासस्थित रिसोर्टमा शपथ गराएपछि राजनीतिक विवाद चर्किएको छ। त्यसपछि मुख्यमन्त्री र प्रदेश प्रमुखका कार्यालयमा तोडफोड भएको र मन्त्रालयहरूमा तालाबन्दी गरिएको छ। सरकार गठनलाई संविधान र सर्वोच्च अदालतका नजीर विपरीत भन्दै आलोचना बढेको छ। सोमबार बसेको मन्त्रिपरिषद् बैठकले भण्डारीलाई पदमुक्त गरी सुरेन्द्रलाल कर्णलाई नयाँ प्रदेश प्रमुखका रूपमा सिफारिस गरेको छ।
