विश्वकप उपाधिका लागि स्पेन र अर्जेन्टिना भिड्दै

काठमाडौँ :  फिफा विश्वकप २०२६ को उपाधि भिडन्तमा राति युरोपियन च्याम्पियन स्पेन र साबिक विजेता अर्जेन्टिनाबीच प्रतिस्पर्धा हुँदैछ। अमेरिकाको मेटलाइफ स्टेडियममा नेपाली समयअनुसार सोमबार राति पौने १ बजे सुरु हुने फाइनलमा आक्रमण र रक्षाको रोचक भिडन्त हुने अपेक्षा गरिएको छ।

प्रतियोगिताभर अर्जेन्टिनाले सर्वाधिक १९ गोल गर्दै प्रभावशाली प्रदर्शन गरेको छ भने स्पेनले केवल एक गोल मात्र बेहोरेको छ। फाइनलमा १९ वर्षीय लामिन यामाल र ३९ वर्षीय कप्तान लियोनेल मेस्सीको प्रतिस्पर्धा पनि आकर्षणको केन्द्र रहनेछ। मेस्सी आठ गोल र चार असिस्टसहित गोल्डेन बलका प्रमुख दाबेदार छन् भने गोल्डेन बुटको दौडमा फ्रान्सका किलियन एम्बाप्पे १० गोलसहित अघि छन्।

स्पेन सन् २०१० पछि दोस्रो विश्वकप उपाधिको खोजीमा छ भने अर्जेन्टिना लगातार दोस्रो पटक च्याम्पियन बन्ने लक्ष्यमा छ। दुई टोलीबीच हालसम्म १४ खेल हुँदा दुवैले समान ६-६ खेल जितेका छन् भने दुई खेल बराबरीमा टुंगिएका छन्। विश्वकपमा भने उनीहरू ६० वर्षपछि पहिलोपटक आमनेसामने हुन लागेका हुन्।